الأربعاء، 16 سبتمبر 2009

انى حائره

الحقيقه انا قررت اكتب ومش عارفه اكتب ايه لانى مش فهمه اللى جوايا اصابنى حاله من الاكتئاب الشديد مش عارفه اخرج منه مش عارفه من ايه مفيش جديد حصل خناق فى البيت طب ما ده العادى وحده بردو عادى قرف بعمله بردو عادى ايه الجديد الى كئبنى كده حسه انى مش عايزه اكلم حد ممكن ده ناتج من العلاقات الاعتماديه اللى اتبهدلت واتذليت واتهنت فيها بقى عندى نفور من الناس كلها حتى اللى بحبها مش عايزه اتعامل معاهم مش عارفه اوصف اللى جوايا بس حسه بتعب اوى كأنى حاجه ثقيله اوى على قلبى مش راضيه تتشال .....

غير ان زاد كرهي لنفسى كبنت مش طيقه كده نفسى انام اقوم الاقى نفسى ولد........الولد يقدر ياخد حقوقه...الولد محدش يتحكم فيه...الولد يقدر يدافع عن نفسه...الولد ليه حق الدنيا دى...الولد ممكن يقول لا ويعترض ويحتفظ برايه...الولد يعمل اللى هوه عوزه...الولد ممكن يستقل ويبقى ليه حياته الخاصه...الولد يعلى صوته الولد قوى...الولد يختار اللى بيحبها...الولد كل حاجه...لكن البنت متعليش صوتك...البنت تقول حاضر...البنت ضعيفه...البنت كلام الناس...البنت متعملش كده...البنت البلد كلها تتحكم فيها...البنت عيب تختار حد بتحبه...البنت عيب تقول عايزه اعيش لوحدى...البنت عيب تستقل وتبقى ليها حياتها الخاصه...البنت عيب تعترض وتقول لا...البنت ولا حاجه........

بمعنى صح الولد عبد لربه فقط وحر فى دنيته ........ ولكن البنت عبده لربها وعبده لعبيده اذااااااااااااى ده ظلم ده قهر ده مش عدل

يعنى المفروض بردو البنت دى اول ما تكبر ويبقى ليها مطالب وتبقى انسانه بتحس وليها شخصيتها ذى الولد المفروض يعنى متخدوش حقوقها هيه تروح تولع فى نفسها على طول عشان ترتاح وتريح اللى حواليها ده حتى زمان كانت البنت دى عار وبيوئدوهم بس فى تقدم والله مبقوش بيوئدونا بس بيعملو اصعب وابشع من كده بيموتونا واحنا عايشين..

هوه ربنا خلق الدنيا للرجاله بس ده حتى لما تلاقى حد يحب بقى يبينلك ان الرجاله دول شئ عظيم يقولك ده حوا جت من ادم يعنى لولا ادام مكنش فى حوا الراجل واخد حقوقه حتى فى الدين يعنى ربنا اداله حقوقه من غير حاجه وجت الدنيا اديته حقوقه بردو طب فين حقوقنا احنا

انا مش عارفه اوصف احساسى ومهما قولت مش هعرف اعبر عن اللى جوايا بس انا حسه انى ولا حاجه حسه ان مخلوق لمجرد يحس انه قليل وان الولد احسن وافضل منه كرها نفسى اوووووووووووووووووووى مش عارفه اتقبلها ومهما الناس تقولى البنت والبنت كلام الشعارات ده بس فين الفعل ولا حاجه ولا اى فعل البنت دى ملهاش اى حاجه فى الدنيا

ممكن اكتئابى هوه اللى مخلينى مش طيقه الناس كلها بلا استثناء انا مش طيقه نفسى حتى مش عارفه اقول ايه ادعى ربنا اقوله ايه اما ربنا نفسه فضل الرجاله على الستات

اخر الكلام البنات مجرد نكره فى المجتمع

هناك 12 تعليقًا:

  1. عزيزتى مثلية فى طريق التعافى
    هدعى لربنا ان يساعدنا جميعا فى طريقنا "طريق التعافى"
    بحترم مشاعرك جدا ومقدرها وفاهم ألمك

    "ممكن ده ناتج من العلاقات الاعتماديه اللى اتبهدلت واتذليت واتهنت فيها"
    فعلا العلاقات الاعتمادية ذل الغريب وأنا بتخلص من علاقاتى الاعتمادية نشأ خوف عندى من إنشاء علاقات صحية مع الاخرين خشية إن تتحول العلاقة لعلاقة إعتمادية أعتقد إن مع نضوجى هيزال هذا الخوف وهيكون عندى المهارة لأنشاء وإستمرار العلاقات الصحية مع الأخرين...

    ممكن الولد مايقدرش ياخد حقوقه...الولد ممكن يتحكم فيه...الولد ممكن ما يقدرش يدافع عن نفسه...الولد ممكن ما يكونش ليه حق الدنيا دى...الولد ممكن ما يقول لا ولا يعترض ولا يحتفظ برايه...الولد ممكن ما يقدرش يعمل اللى هوه عوزه...الولد ممكن ما يقدرش يستقل و مايبقاش ليه حياته الخاصه...الولد ممكن ما يقدرش يعلى صوته الولد ممكن يبقى ضعيف...الولد يختار اللى بيحبها مش ديما...الولد ممكن مايبقاش ولا حاجه ...

    اللى عاوز أقوله إن مش المشكله كونى ولد أو بنت المشكله فيمن حولى اللى بيمارسوا فى التربيه عليه طريقة القهر فابالتالى أصبت بالمثلية

    ممكن أرجعلك تانى عشان أكمل تعليقى
    مع السلامه

    ردحذف
  2. كوكو

    انتى محتاجه تحبى نفسك اولا
    وفعلا محتاجه تحبى نفسك كبنت
    انا زيك اول شئ كنت بتمناه فى حياتى
    انى ابقى ولد لان ليه كل شئ
    بس بعد ما خرجت الانثى اللى جوايا فعلا
    حسيت قدايه احنا فى نعمه كبيرة

    كون الرجاله مقومون عن النساء
    دا تكريم للمراءة مش اهانه
    الست بتعقد معززة مكرمه وبيجلها كل
    شئئ لحد عندها والراجل هو اللى انكتب عليه
    الشقى والحرب وكل شئ

    الجنه تحت اقدام الامهات
    وربنا اداهم رخص كتير يوصولوا بيها للجنه
    البنت عندها مقومات مش عند الرجل
    وتقدر تستغلها لصالحلها

    بس العيب فى المجتمع والعادات والتقاليد
    مش فى الاسلام ولا ربنا لاننا فى مجتمع مسلمين
    لكن محدش بيطبق العقيده ولا المنهج الاسلامى
    صدقينى الاسلام اكثر سماحه من اللى بيحصل
    وربنا مالوش دخل فى اللى بيحصل
    كلنا هنرجعله وهنتحاسب وربنا برئ من اللى بيحصل
    لاضطهاد اى فتاه على اى ديانه

    بجد لو غيرتى تفكيرك فى نظريه الولد والبنت
    هتحسى الفرق الكبير وقد ايه نعمه احنا بنات
    حاولى تتعاملى مع البنت اللى جواكى بذكاء
    خرجيها اطلقى صراحها .. حققى ذاتك
    اعملى اشياء تخليكى راضيه عن نفسك
    وفى نفس الوقت متخليش حد يجى على كرامتك
    كبنت حتى لو كان اقرب الناس ليكى باحترام طبعا

    انتى محتاجه تلاقى نفسك وتثبتى كيانك لذاتك اولا
    محتاجه لحد يخرج الكنوز المدفونه جواكى
    ويوريكى قد ايه جواكى كويس ويستاهل يخرج
    للنور كبنت

    عشان كنت بفكر زيك ونظرتى اختلفت تماما
    بقولك فى امل انك تحبى البنت اللى جواكى
    وان شاء الله فى يوم هتكتبى بوست
    تقولى فيه انك فخورة انك بنت وتحمدى ربنا
    انه خلقك بنت .. زى ما انا تفكيرى اتغير
    فى النقطه دى بالذات .

    ردحذف
  3. سؤال بس ياكراميلا ايه النعمه اننا بنت وايه اللى اتفضلنا بيه اصلا ويسلام الرجال قومون على النساء دى تدل اننا احسن منهم طيب انتى ليه مكملتيش الايه بما فضل الله بعضهم على بعض بصى انا مبحبش اقول اصل البنت دى جوهره اصل البنت دى ربنا خلاها كده عشان يحافظ عليها وانها حاجه مهم لا انا احب الفسر الحاجه صح مش على مزاجى واحس افسرها بردو بالافعال اللى بتحصل ادينى ميزه واحده تقول ان البنت دى نعمه ده اصلا فى حاجه بتقول ان البنت دى بلاء من ربنا بس مش فكراها

    ردحذف
  4. مثلية فى طريق التعافى

    عمرى ما هقولك كلام شعارات ومش حاسه بيه
    رغم ظروفنا المتشابهه الا انى قدرت اخرج من نقطه
    انى ابقى ولد وبتمنهالك من كل قلبى
    دا اكيد ضمن تعافيكى ووصولك للشفاء

    انا عانيت منها زيك تماما
    بس الفرق انى حاولت فعلا
    بعد طول مجاهده انى اثبت ده لنفسى
    اولا قبل اى حد تانى ودلوقتى راضيه
    انى بنت رغم التخلف اللى بنعيشه فى مجتمعنا
    بس هعمل المستحيل انى احقق ذاتى وارضى عن نفسى
    تماما

    ثم انسى انك عايزة تكونى بنت او ولد
    افتكرى انك انسانه قبل اى شئ
    ولازم اللى قدامك يعاملك كويس سواء بنت او ولد
    دا حقك كانسانه ..

    انا مقدره تعبك ومتفهمه كل اللى بتمرى بيه
    ومريت بيه انا كمان
    ربنا يخفف عننا كلنا كل اللى بنمر بيه

    وبعتذر لوكنت دايقتك :)

    ردحذف
  5. من زعلتش لكن انتى بتقولى نعمه انى بنت بقولك عايزه اعرف نعمه وحده بس

    ردحذف
  6. مش حاجه تتقال تتحس فقط
    هسيبك تكتشفيها بنفسك
    وحتى لو كتبتها من جواكى
    هتخلقى الف سبب وسبب
    مدمتى من جواكى مش حباها

    يمكن اللى خلانى أعلق
    انى فعلا مريت بكل اللى كتبتيه
    ويطول الحديث فى ازاى خرجت منه

    قلبى معاكى مرة تانيه :)

    ردحذف
  7. انا مع مجاهد في الرأي مجتمعنا مجتمع متخلف وعقيم
    بس في حاجه لازم البنت تكون عارفاها
    تقدر تتحمل ضغوط الحياه و التلطيش و البهدله اللي بيشوفها الاولاد على فكره الرجاله معاناتهم احيانا بتكون تقيله قوي
    تحياتي

    ردحذف
  8. اه البنت دلوقتى بتشتغل وبتبهدل وبتبقى مسئوله عن نفسها وكل حاجه علفكره يعنى خلاص مبقاش ذى زمان الراجل يشتغل بره ويجي يصرف عليها مقابل انها تعمله الاكل وتربيه الاولاد ذى مربية الاطفال بظبت والشغاله لا دلوقتى الست بتقوم بالدورين انا والدتى ذات نفسها بتشتغل وبتقوم بمهام المنزل وكان شغل ذى والدى بظبت يعنى هيه بتعمل اكتر منه ظغوط الحياه الكل متحمله ده يمكن الستات بيتحملوها اكتر من الرجاله والبهدله والتلطيش الشغل كله فيه كده واحنا بقينا نشتغل فين بقى حقوقنا كانسان كبشر

    ردحذف
  9. الله سبحانه وتعالى عادل ولم يظلم عباده لا الذكور منهم ولا الاناث ولكننا نظلم بعض فالاب يظلم ابنته لانه يربيها طبقا لعادات جاهلية من وضعها البشر والزوج يظلم زوجته بان يتجاهل الحقوق التى اعطاها لها الله والاخ يظلم اخته لمجرد ان يشعر بتفوق مزعوم لا حقيقة له ويعنيه على ذلك ابويه. أنا أعرف الكثير من البنات اللاتى يعشن حياة يحسدهم عليها بعض الذكور لانهم تربوا فى بيئة تعلم وتطبق عمليا معنى وقيمة الانثى ودورها الذى لا يمكن للحياه أن تستقيم بدونه ..المشكلة يا ابنتى فى اننا لا نطبق منهج الخالق ولو طبقناه لاخذتى حقوقك كاملة ولكنتى انسانا يعتز بانسانيته أولا وبتكريم الله لك
    لقد ظلمتك اسرتك ومجتمعك فلا تشاركيهم بان تظلمى نفسك وترضى لها هذا الذل
    انت عزيزه كريمه حرة هكذا خلقك الله فان لم تؤمنى بهذا وان لم تسعى جاهده لتقويه نفسك من الداخل فلا تلومى الناس ولا اسرتك فالخضوع للظلم والشعور المتزايد بالنقص يغريهم بالتمادى
    لا تظنى اننى ادعوكى للتمرد والثوره عليهم بل بالثوره اولا على نفسك وان ترحميها والا فلا تطالبى الاخرين بذلك
    حاولى معرفة حقوقك وفهم معنى الحرية لانى أرى أن الامر يختلط عليكى فى بعض الأحيان وبدون هذا الفهم الصحيح فلا يمكن أن نصل الى بداية الطريق ولا ان نكمله
    اتمنى ان ارى ردك على تعليقى واتمنى ان تتأملى كلماتى جيدا وارحب باختلافك معى لاننا بشر قد نخطأ ولى عوده ان شاء الله
    مع خالص احترامى

    ردحذف
  10. انا احترم تعليقك جدا وسعيده بمرورك المدونه والاهتمام ولكن انا معاك ان لازم انا ادافع عن نفسى واحميها واعرف حقوقى لكن مين اللى هيدينى حقوقى دى مثلا لو اعترضت بزياده او وقفت ادام اللى بيظلمنى لو هوه اقوى منى مثلا اخويا بما انه راجل هيمد ايده عليا وتبقى الاهانه اكتر يعنى بدل ما تهزئ بس لا ضرب فانا بحترم نفسى بمعنى اصح وبسكت عشان ميعملش كده يعنى بردو الموضوع مش فى ايدى انا
    اشكرك

    ردحذف
  11. الناس ردت عليكي رد زي الفل بس انتي دماغك ماشية فسكة واحدة بس وطبعا في النهاية كلنا غلطانين وانتي فله وردة شمعة منورة

    ردحذف
  12. هههههههه لو سمحتى ياهناء انا دماغى مريحانى وكل واحد بيقول اللى حاسس بيه وساعات ناس بتقول الكلام اللى الكل بيقوله اللى انا بقول عليه كلام الشعارات لكن انا بتكلم عن احساسى وعن ارض الواقع
    تحياتى ليكى

    ردحذف